好眠百科：瘦底都會有？瞓得差或患睡眠窒息症

「咕...呼...咕...」夜闌人靜，隔籬屋成晚傳出巨響。天啊！係鼻鼾聲呀！不過，如果鼻鼾聲勁到隔籬屋都聽到，就要小心患上睡眠窒息症嘞。

睡眠窒息症係香港常見睡眠失調症嘅一種，患者會喺睡眠中停止呼吸。咪以為肥胖人士先係高危，纖瘦人士都會因為下巴短小、氣管較窄、舌頭肥大或鼻瘜肉等而患有此症。

睡眠窒息症患者除咗大鼻鼾外，因為睡眠嗰陣長期缺氧，亦會大大增加心肺負荷，對功能造成永久性損害。亦容易有高血壓、中風、心血管病，記憶退化等，嚴重者甚至會猝死。

咁嚴重？想知自己有冇睡眠窒息症，就要認住以下3大病徵！

1.長期嚴重鼻鼾 幾乎每晚都會扯鼻鼾，而鼻鼾聲大到隔住道門都聽到，自己就未必知道，不過瞓喺隔籬嗰個一定食晒嘞，仲分分鐘「想一腳踢你落床」！

2.成日扎醒 鼻鼾聲會間中停止，隔一陣又會突然大聲響起，周而復始。呢種情況每晚可以發生逾百次，每次持續約十秒至數分鐘不等。嚴重者仲會因為「唞唔到氣」而成日扎醒。

3.睡眠質素差 患者經常處於淺層睡眠，會覺得「瞓極都唔夠」，睡眠質素差，日間不單止冇精神，容易瞌眼瞓外，仲會有疲累、頭痛等病徵。

以上徵狀，只要同時有兩個或以上，就應該盡快求醫嘞！

資料來源